موناکو میں رہائشی اپارٹمنٹ کی ریکارڈ ساز فروخت، 55 کروڑ ڈالر میں کس نے خریدا؟

دنیا کا مہنگا ترین پینٹ ہاؤس فروخت کر کے رئیل اسٹیٹ کی تاریخ کا نیا عالمی ریکارڈ قائم؛ 21 کمروں پر مشتمل رہائش گاہ بحیرہ روم کے ساحل پر واقع
ویب ڈیسک
10 مئی 2026
رئیل اسٹیٹ کی دنیا سے ایک حیران کن خبر سامنے آئی ہے جہاں یورپی ریاست موناکو میں ایک رہائشی اپارٹمنٹ نے قیمت کے تمام سابقہ ریکارڈ توڑ ڈالے ہیں، یہ عالیشان پینٹ ہاؤس 55 کروڑ 40 لاکھ ڈالر (تقریباً نصف ارب ڈالر سے زائد) کی خطیر رقم میں فروخت ہوا ہے۔ اس ریکارڈ ساز خریداری نے عالمی مارکیٹ میں ہلچل مچا دی ہے، جس کے بعد یہ اپارٹمنٹ اب تک کی مہنگی ترین رہائشی جائیداد بن گیا ہے۔
اس مہنگے ترین سودے کے پیچھے یوکرین کے امیر ترین شخص ریناٹ اخمیٹوف کی کمپنی ‘سسٹم کیپیٹل منیجمنٹ’ کا نام سامنے آیا ہے، جنہوں نے موناکو کی مشہورِ زمانہ ‘لے رینزو’ عمارت میں یہ پینٹ ہاؤس خریدا ہے۔ 26 ہزار 900 مربع فٹ سے زائد رقبے پر پھیلا ہوا یہ پینٹ ہاؤس پانچ منزلوں پر مشتمل ہے، جہاں سے بحیرہ روم (Mediterranean Sea) کا سحر انگیز نظارہ صاف دکھائی دیتا ہے۔ اس رہائش گاہ کی خاص بات اس کا ساحل کے بالکل کنارے واقع ہونا ہے جو اسے دنیا کی دیگر مہنگی عمارتوں سے ممتاز بناتا ہے۔
اگر اس اپارٹمنٹ کی سہولیات پر نظر ڈالی جائے تو یہ کسی محل سے کم نہیں ہے، اس میں 21 وسیع و عریض کمرے، 8 پرائیویٹ پارکنگ سلاٹس اور جدید ترین اسمارٹ ہوم آٹومیشن سسٹم نصب ہے۔ پُر تعیش طرزِ زندگی کے شوقین افراد کے لیے یہاں نجی سوئمنگ پول، جکوزی اور کئی وسیع ٹیرس موجود ہیں جو براہِ راست سمندر کے رخ پر ہیں۔ واضح رہے کہ موناکو رقبے کے لحاظ سے دنیا کی دوسری چھوٹی ریاست ہونے کے باوجود دنیا کی مہنگی ترین رئیل اسٹیٹ مارکیٹ ہے، جہاں اس حالیہ فروخت نے ثابت کر دیا ہے کہ عالمی سرمایہ کار اب بھی اس ریاست کو محفوظ ترین سرمایہ کاری کا مرکز مانتے ہیں۔